قطعت الكهربا الساعة 8:00 الصبح, وهادا اشي كويس لأنه الواحد بيكون نايم, يعني لما بدو يصحى من النوم الساعة 11 بيكون قتل ثلاث ساعات على الأقل, فالجامعة معلقة(عطلة طارئة يعني) عشان فش سولار, بالتالي فش سيارات توصلنا, فاجتمعت إدارة الجامعة حوالي ساعتين وبالآخر طلعوا وقالولنا: روحوا إقروا في دوركوا لحد ما الله يفرجها. يعني روحوا ناموا, وأنا اسمعت الكلام وهيني كل يوم بنام.
المهم..
الساعة 12 ونص الظهر, أجت الكهربا, والبنات فرحن كتير لدرجة إنهم صاروا يقولوا: الله يلعن أبوكوا كلاب, أيوة هيك من زمان, إمنيح مضيعتوا علينا الحلقة الأخيرة من المسلسل إلنا أكتر من شهرين بنتابعه عشان منعرفش النهاية؟ (المسلسل الكوري إمبراطور البحر) وراحن فتحن التلفزيون وقعدن.
الساعة 12:45 قطعت.
الله يلعن أبوك كلب يللي قطعتها, ردت أختي التانية: مهو لو اللي قطعها بيحضر المسلسل كان مقطعهاش. أختي التالتة: يا مجانين اليهود هما اللي قطعوها ايش دخلنا إحنا؟ ردت أمي: كيف ايش دخلنا؟ والله إحنا أس البلا بس قاعدين بنكابر...
أخوي: يا عالم إحنا في ايش والله في ايش؟ فكروا معايا كيف بدنا نحضر المسلسل اليوم.
أخوي التاني: إحضروه عالشنبر ههههههههههههههههه
اخوي: شوف التاني مخدها مسخرة, إحكي جد يا راجل, وفكر معايا بقللك.
أخوي التاني: والله إنك أهبل, أصلا الشنبر فاضي فش فيه غاز هههههههههههههههه
أختي: طب مدوا كابل من مبنى الهلال ( الهلال الأحمر الفلسطيني) في عندهم متور كهربا, وبعدين إصحابنا بيقولوش إشي.
أخوي: إنت مجنونة والله ايش الدعوة؟ من وين نجيب كابل 30 متر؟ هادا إزا رضيوا, هدولا حمساوية اللي ماسكين الهلال هلقيت.
أخوي التاني: يا أخي بدناش يحضرونا المسلسل, بس الخزوق إزا ضللوا لألفين وعشرة مش هنحضر كاس العالم هههههههههههههههه وهات وسلّك حينها.
أختي التالتة: إيش رايكوا نروح كلنا على دار أختي في المعسكر يمكن جاية الكهربا عندهم؟
أختي التانية: أه, إتصلوا عليهم شوفوا الكهربا جاية والله لأ؟
أخوي: يا عمي بينفعش كلامكوا هادا, ايش يقولوا عنا؟ أجوا علينا عشان المسلسل؟ لا لا يا عم.
أخوي التاني: خليهم يفتحوا ع المسلسل وينقلوكوا الأحداث ع الجوال ههههههههههههههه
بعد مرور ساعات..
أختي: خلص ضاعت الحلقة الأخيرة.
أختي التانية: بدنا نتصل نعرف ايش صار في المسلسل
إتصل أخوي, والكل قاعد
أختي: أه, إيش قالولك؟
أخوي: هههههههههههههههههههههههههههههههههه
أختي مالك بتضحك, إيش في؟
أخوي: قناة دبي مجابتش المسلسل اليوم
كلنا: بحياة ربك؟
أخوي: أه والله أبصر إيش في؟
أختي: مش مهم إيش في, المهم إنه منعرضش, يعني بكرة بنحضره هههههههههه الحمد لله.
أجا بكرة..
أختي: الكهربا لهلقيت ما قطعت من الصبح والله لألعن أبوهم إزا بقطعوها هلقيت.
أختي التانية: والله بموت ليقطعوها, أعصابنا انحرقت من امبارح لليوم.
بدا المسلسل والوضع تمام, وبعد تلت ساعة من بداية المسلسل..
قطعت.
أختي: ...
أختي التانية: ...
اختي التالتة: ...
أمي: فش نصيب ايش بدنا انسوي يعني؟
أخوي: ...
أختي: خلص بنحضرها في الإعادة ع الساعة 5:00 الفجر, إحنا بدنا ننزَل عشان المسلسل؟
بعد ساعة..
أخوي: أجتني فكرة, إحنا ليش ما نحمّلها عن النت؟ وبنحضرها على راحتنا في أي وقت؟
أختي: أه, أمانة اتحملها أول متيجي الكهربا.
في اليوم التالت..
حضروا المسلسل الساعة 5:00 الفجر.
أمي: والله يا ريتني ما احضرت المسلسل.
أنا: ليش؟
أمي: بحزّن كتير, والله ما بطلنا دموع!
أنا: المهم احضرتوه وبطّينا هالدُمّل.
أمي: والله قولتك, دُمّل.
هناك 4 تعليقات:
Hello! Your blog is very interesting. I find it worthy of the visit.
Smart wangbu
Thank you for the compliment for Whitney beautiful English so I can stay with you better.
Nintendo
قصة جميلة وأيام جميلة بلا كهرباء
قد تكان تخلو منطقتنا من هذه الحركات (قطع الكهرباء) قد كانت مشكلة لدينا في قريتنا الحبيبة ولكنها تتقلص مع الزمن
ولكن غزة ما مصيرها .. أهو ظلام دامس .. أهو أمر حتميّ
ونحيي الدين في حمآس ,,
ونحمل راية فتح فتح فتح ,,
cheq
شكرا لمرورك تشي,
هي قصة مؤلمة أيضا, أتمنى أن تخلو قريتك منها وممن يروونها.
مصير غزة ربما يكون التوحد مع ظلام سيناء وصحرائها, مادام الوعي غائبا عن الغزيّ المسكين.
لك كل الود تشي
ومحبتي.
إرسال تعليق